Op 11 febrewaris 2026 folge klyster Trudy van Assen de gearkomste foar moestún- en itensiederscoaches yn Nieuw Allardsoog, Bakkefean. Workshop 1 wie de Soples fan PlukWad, wêryn’t leare en itensiede út de skoalgrientetún wei sintraal stie. Workshop 2 gong oer Ytbere Natuer en waard fersoarge troch IVN. Dêryn koene se ûntdekke hokker planten om ús hinne ytber binne en hoe’t se werkend en brûkt wurde kinne yn de itensiedersles. Workshop 3 “Red de Groninger Boon” waard fersoarge troch Jong Leren Eten Grins.

Nei ôfrin fan de workshops waard praat oer hoe’t ynstânsjes en ZZP-ers yn 2026 gearwurkje kinne, yn de kampanjewiken Wike fan de Skoaltún, Kok yn de Klas en Wike fan ús Iten en hoe’t de stipe fanút Jong Leren Eten befalt en oanslút by it ferlet.

De Klyster hat 4 moestúncoaches dy’t ynset wurde om bern te belûken by sûn iten en by wêr’t harren iten weikomt. De Klyster ûndersiket de mooglikheden om yn ‘e takomst ek itensiederscoaches oan te bieden oan it basisûnderwiis.

 

Op woansdei 28 jannewaris waard de jierlikse konferinsje Kind en Natuur wer organisearre troch it IVN. Dit jier wie Eline dêrby oanwêzich.

Dit jier wie it tema “De ûnsichtbere wrâld”, de ympakt fan mikro-organismen op ús sûnens. In sûne fariaasje fan mikro-organismen yn ús termen waard troch ferskate sprekkers fergelike mei in sûn ekosysteem. Om dit ekosysteem yn stân te hâlden, is kontakt mei de natuer foar bern essinsjeel.

Nei de iepening mei sprekkers, stiene natuerbelevingen en workshops sintraal op de konferinsje. Ek wie der de romte om te netwurkjen mei minsken út it wurkfjild en mei-inoar nije ynspiraasje op te dwaan.

It wie in slagge dei!

 

Op woansdei 17 desimber 2025 fûn de tradisjonele krystbuorrel fan De Klyster plak foar it team fan frijwilligers, projektmeiwurkers en bestjoerders. Manager Bauke Zwaagstra fan de gemeente Noardeast-Fryslân wie diskear ien fan ús spesjale gasten. Hy makke fan de gelegenheid gebrûk om yn ‘e kunde te kommen mei de klystergidsen en oare belutsenen.

De krystbuorrel waard hâlden by restaurantbuorkerij de Omleiding yn Feanwâlden. Nei kofje mei húsmakke gebak begûn teamlieder Marjolein Staal mei in weromblik op it ôfrûne jier. Yn it each springende projekten en foarfallen waarden memorearre. Leafst 11.349 x giene bern mei De Klyster op ‘n paad en 99 x waard in leskist útliend.

Dêrnei fertelde de oare spesjale gast learkrêft Erik Lei oer syn passy foar de natuer en hoe’t hy dat oerbringt op syn learlingen. In moai foarbyld út syn ûnderwiispraktyk is syn projekt Soortenjacht, wêryn’t er syn learlingen útdaget om 100 soarten te finen yn it skoaljier. Erik fertelde ek hoe wichtich De Klyster is foar it ûnderwiis en benammen foar dy kollega’s dy’t krekt wat minder witte oer de natuer. Erik sil fan 2026 ôf frijwilligerswurk dwaan foar De Klyster. Hy foarmet in moaie oanfolling op it klysterteam.

Marjolein joech dêrnei in foarútblik en fertelde oer de nije projekten yn 2026 en kundige ek it 30-jierrich Klysterjubileum oan. Sippy Tigchelaar, bestjoerslid fan de Freonen fan De Klyster, ynterviewde dêrnei frijwilligers en projektmeiwurkers oer harren belutsenheid en wurk foar De Klyster. Dat smiet prachtige befleine ferhalen op, dy’t wer in plakje krije sille yn it noch gear te stallen jubileumboek. It moaiste komplimint kaam fan waadgids Peer Zaal: “De Klyster fielt as in famylje!”.

Nei it formele diel stie in hearlik buffet klear en koe elkenien wer fierder byprate. By einsluten sjogge de natuergidsen inoar net faak, want se dogge harren wurk mei bern ferspraat oer hiel noardeast Fryslân: fan Moddergat oant Feankleaster en fan de Lauwersmar oant it Bûtenfjild. En dan is it noflik om oan ‘e ein fan it jier elkoar fertelle te kinnen oer alle meimakke bysûndere natueraventoeren.

Nei ôfrin stie foar elkenien in moai krystpakket klear. It wie in slagge krystútsje.

 

 

De Klyster is hiel grutsk op natuergids fan it earste oere frijwilliger Betty Kooistra. Betty wûn de Johan-de-Jong-Beam fanwege har ynset foar natueredukaasje.

Betty keas in stoofparrebeam dy’t yn har tún pleatst is. By dit feestlike momint op sneon 22 novimber 2025 wiene kollega’s út de natueredukaasje, freonen, famylje, de sjuery en in kameraploech fan Omrop Fryslân oanwêzich. Betty Kooistra en teamlieder Marjolein Staal waarden foar it tv-programma Op en Ut ynterviewd oer de priis en de needsaak fan natueredukaasje.

Sjoch en harkje nei in kompilaasje fan de reportaazje troch te klikken op ûndersteande sin.

Zelfs met haar eigen prijs wil Betty Kooistra de schoonheid van de natuur laten zien: “Stoofperen voor de hele buurt”

Op freedtemoarn 14 novimber stie De Klyster yn it ramt fan de 19e edysje fan it projekt ‘ Jou in bern in boek ’. Alle bern út groep 5 fan de gemeenten Achtkarspelen, Dantumadiel, Noardeast-Fryslân en Tytsjerksteradiel krigen dêrby fergees it Fryske boek ‘ Paula en de weirekke spegel ’.

De offisjele útrikking waard ferrjochte troch wethâlder Wiebe Strikwerda fan de gemeente Dantumadiel en berneboargemaster Luuk de Bruin, yn oanwêzigens fan SO De Wingerd, CBS De Sprankeling, OBS Theun de Vriesskoalle.

Lês mear  https://www.rtvnof.nl/19e-editie-jou-in-bern-in-boek-by-de-klyster-yn-damwald/723409/