Dizze wike berikte ús it drôve berjocht dat âld-frijwilliger fan De Klyster Sieberen Postema op tiisdei 21 july op 78-jierrige leeftyd hommels ferstoarn is. Sieberen Postema wie fan 2008 ôf oant en mei 2022 frijwillige natuergids by De Klyster.

Hikke en tein yn de Wâlden op’ e Tike, boarte Sieberen as bern altiten bûtendoar en sa ûntstie in sterke bân mei de natuer. En dat bleau, want hy wie noch altiten regelmjittich te finen by de Leijen, fierrekiker om ‘e nekke.

Sieberen hâlde fan de natuer, fan it fiskjen, d’r op út mei it boatsje, fûgels sjen, en hy mocht der hiel graach oer fertelle, benammen oan bern, want it oerbringe fan leafde foar de natuer fûn er tige wichtich. Hy hat dêrom destiids de natuergidsenoplieding fan it IVN folge en is sadwaande yn 2008 by NME-sintrum De Klyster kaam as frijwillige natuergids.

Sieberen hat sa’n 3.000 bern kennismeitsje litten mei de natoer yn noardeast Fryslân. Hij wurke mei oan û.o. de projekten: Noardlike Fryske Wâlden, takomst foar in unyk lânskip, Waadstrúne,  Swalkkuier troch it Houtwiel en Op Avontoer by de Boer.

Troch syn grutte postuer en waarme swiere stim makke Sieberen yndruk, mar de measte yndruk makke hy wol as hy it ikoanyske doaske út de bûse wei helle. Tidens de ekskurzjes oan bern fan de boppebou tovere hy steefêst dat doaske mei nijsgjirrige natuerskatten foar it ljocht mei û.o. in hazzepoatsje, in kowetosk, in fûgelpoatsje en by eltse skat fertelde Sieberen in sterk ferhaal en dat makke syn ekskurzjes foar bern, mar ek foar learkrêften en âlders, ta in ûnferjitlike natuerbelibbing.

Sieberen wie in smoute prater en dat wie der ek tidens de teamútjes fan De Klyster. Hy naam faak efkes it wurd en dan waard der hiel wat ôflake om de sterke ferhalen fan dizze Wâldpyk, mei in hert fan goud en op it goede plak.

Sieberen Postema hat in soad betekene foar De Klyster op it mêd fan edukaasje, en ek foar it Fryske Gea, wêr ’t hy ek frijwilliger wie en him dwaande hâlde mei natuerbeskerming troch it tellen fan fûgels.

Sieberen, natuerminsk en sympatike kollegagids, do stiest yn ús ûnthâld gravearre en wy tinke mei in soad respekt en in glim om ‘e mûle oan dy werom.

Ut namme fan it klysterteam winskje wy de neisten en syn frou Lammie, in soad sterkte ta mei it ferwurkjen fan dit grutte ferlies.

 

Yn de parse by RTV-NOF ferskynde it folgjende berjocht.

Oud-natuurgids De Klyster Sieberen Postema overleden – RTV NOF Nieuws

 

 

Freed 26 juny 2026 folge berneboargemaster Menthe van der Zee in nijsgjirrige les oer greidefûgels by groep 6 fan master Erik Lei fan de Burgerschool yn Dokkum. Master Erik is in echte natuermaster en daget syn groep út om safolle mooglik fûgels te spotten. Dizze les gie it oer de ljip*, in echte greidefûgel. Foar dizze les wie ek Pyke Kroes fan IVN natueredukaasje oanskood. Pyke joech bûten in wjirmeles. Ljippen en oare greidefûgels ite nammentlik hiel graach wjirms en oare ynsekten en boaiembisten.

De learlingen learden ek dat it aaisykjen al in âlde Fryske tradysje is en dat tsjintwurdich de aaien net mear meinommen wurde, mar op ‘e foto set. De priis foar de finer fan it earste ljipaai fan Fryslân is de Sulveren Ljip en wurdt útrikt troch de Kommissaris fan de Kening. Dêrneist is der in priis foar it bern dat it earste ljipaai fynt; It Sulveren Polske.

Ek de gemeente Noardeast-Fryslân rikt in priis út foar de finer fan it earste ljipaai yn de gemeente. “Spitich dat der gjin bernepriis is”, fine de learlingen. De berneboargemaster en de groep fan master Erik soene dit wol hiel aardich fine nammentlik. De berneboargemaster sil dit by har ôfskied as tip meijaan oan ‘e gemeente.

En wa wit fynt ien fan ‘e learlingen fan master Erik takom jier wol it earste ljipaai en krijt hy of sy in priis út hannen fan boargemaster Johannes Kramer. De learlingen hawwe der no al sin oan. Sy geane derfoar!

* de les is ûnderdiel fan it troch De Klyster ûntwikkele projekt ‘Weidevogel-van-de-Week’.

Op ‘e foto berneboargemaster Menthe van der Zee, Pyke Kroes en groep 6 fan de Burgerschool.

 

Ofrûne sneon 30 maaie 2026 krige Marjolein Staal fan De Klyster de Fryske Natuerpriis 2026 útrikt troch Houkje Rijpstra, direkteur fan Omrop Fryslân. In prachtige erkenning foar har jierrenlange ynset foar natuer – en miljeuedukaasje.

Under lieding fan Marjolein Staal groeide De Klyster út ta in ynspirearjend sintrum dêr’t jierliks tûzenen bern leare oer natuer, bioferskaat, lânskip en duorsumens. De priis bestiet út it plantsjen fan de Johan de Jong-beam op in troch har keazen plak yn novimber fan dit jier.

Lês hjir it parseartikel.   Marjolein Staal wint de Johan de Jong-boom: “Ik dacht: die prijs gaat naar iemand anders” – Omrop Fryslân

Bekijk hier het filmpje (20+) Facebook

 

30 jier De Klyster – Wy fiere it mei-inoar!

De Klyster bestiet dit jier 30 jier. Al tritich jier fersoargje wy mei passy natuer- en miljeuedukaasje foar basisskoallen. Dizze mylpeal fiere wy graach mei elkenien dy’t dêrby belutsen is: skoallen, gemeenten, frijwilligers, meiwurkers en oare gearwurkingsrelaasjes.

Jubileumfeest op freed 6 novimber

Der komt in ynspirearjend programma mei nijsgjirrige sprekkers. De krekte ynfolling bliuwt noch in ferrassing. Belangstellenden kinne de datum alfêst yn de aginda sette. De ûntfangst is fan 14.30 oere ôf. It programma set om 15.00 oere útein en rint oant uterlik 17.30 oere. Mear details en it folsleine programma folget noch.

Wy sjogge dernei út om dizze bysûndere mylpeal mei-inoar te fieren!

Team De Klyster

Tongersdei 7 maaie 2026 fierde Marjolein Staal har 25 jierrich amtsjubileum tegearre mei it team fan De Klyster, bestjoersleden en famylje, mei in feestlike lunch by restaurantbuorkerij de Omlieding yn Feanwâlden.

Yn maart 2001 begûn Marjolein by De Klyster en har opdracht wie û.o. om it NME-Sintrum op de kaart te setten, fierder út te bouwen en om in skoallenetwurk op te bouwen yn de regio. En dat is goed slagge, want no, fiifentweintich jier letter, telt it team 14 frijwilligers en 11 projektmeiwurkers dy’t har mei hert en siel ynsette om basisskoallebern te belûken by de natuer en it miljeu yn de eigen leefomjouwing en binne alle skoallen lid fan De Klyster. De ôfrûne tiid dogge alle jierren mear as 10.000 x learlingen mei oan klysteraktiviteiten en telt it útliensintrum 75 edukative leskisten!

“Yn dizze tiid wêryn’t hast alle krisissen werom te fieren binne op hoe’t wy omgean mei de ierde, is duorsum-dwaan fan it grutste belang. Dêrfoar is it nedich dat je as bern in goede bân opboud hawwe mei de natuer. Dêrom belûke wy bern by de natuer yn harren eigen leefomjouwing, troch se sjen te litten hoe moai oft de natuer is. Ut leafde, wille en ferwûndering wei kostet duorsum gedrach gjin muoite. En dat moatte we tegearre dwaan, as team mei de skoallen, gemeenten, âlden en natuerferieningen. Dêr bin ik grutsk op en ik hoopje dit noch jierren tegearre dwaan te kinnen”, fertelt Marjolein by har koarte speech.

It wie hearlik waar, de sinne skynde folop en elkenien koe gesellich mei-inoar byprate en oantinkens ophelje. Marjolein waard bedoarn mei in soad kadootsjes en hja geniete fan ‘e gesellichheid. “It wie noflik om dit jubileum mei-inoar fiere te kinnen, dêr bin ik echt hiel tankber foar.”, meldt de jubilaris nei ôfrin fan de feestlikheden.

Klyster Sjanne Pol makke de foto.