Klyster Marjolein Staal is nominearre foar de Fryske inisjatyfpriis de ‘Johan de Jong beam‘. Mei dizze priis wurde minsken yn it sintsje set dy’t har bysûnder ynsette foar de natuer. Marjolein wurket dit jier al 25 jier by De Klyster en makket har hurd foar natueredukaasje foar elk bern. Ek yn har frije tiid is sy oanjager om bern de natuer belibje en ûntdekke te litten. Sa is sy al 10 jier foarsitter fan DikGroen, in stichting dy’t lytsskalige natuerinisjativen stimulearret en finansiert en is sy keazen yn de lederied fan Vogelbescherming Nederland. Fierder sit se yn de inisjatyfgroep fan de Pluktún yn har wenplak dêr’t biologyske giffrije blommen plukt wurde kinne en dêr’t sy foar dwaande is mei in edukatyf programma, sadat ek de basisskoalle learlingen hjirby belutsen wurde.

Har tsjinkandidaten binne ek aktive natuerminsken. Dus it sil sneon 30 maaie noch hiel spannend wêze wa’t de beam wint dit jier. As Marjolein wint kiest se as beam foar in plataan. Dizze beam wol se graach plantsje litte by de PABU, de oplieding foar learkrêften basisûnderwiis, “omdat dit de nije juffen en masters binne dy’t stimulearre wurde moatte om ûnder skoaltiid mei de learlingen nei bûten te gean. De Klyster en oare NME-sintra stypje de learkrêften hjirby graach, want NME-sintra hawwe frijwilligers yn tsjinst dy’t steane te popeljen om de bern de natuer belibje te litten.”, leit se út.

“Foar my is it al in hiele ear dat ik nominearre bin en ik gun it de oare kandidaten ek hiel bot”, seit Marjolein. “It set NME op de kaart en dat is geweldich en ja, winne is fansels leuk”.

Marjolein ferskynde ôfrûne sneon 23 maaie yn it programma Op en Ut fan Omrop Fryslân en it promoasjefilmke sirkulearre op de sosjals. “In moaie promoasje foar achter it byldskerm wei, jas oan, learzens oanen en hup nei bûten“, sa seit Marjolein.

Nei de simmerfakânsje biedt de Klyster de foarstelling ‘Troep!’ fergees oan op alle skoallen.

De foarstelling

Jelmar makket teäter; se litte fan begjin oant ein sjen hoe’t je sênes betinke, meitsje en spylje. By it meitsjen fan dizze foarstelling makket se trouwens ek aardich wat troep. Mar meitsje dy net ûngerêst, de jiskemannen Johan en Johan soargje derfoar dat alles der wer ‘spic en span’ útsjocht en alle troep ek wer kreas opromme wurdt. Dêrby krijt se net allinnich help fan de jiskemannen Johan en Johan, mar ek fan menear van der Laan en buorfrou Trees. Wêrom is menear van der Laan altyd sa lilk en segrinich? Is hy wol hielendal fit? Miskien moat er de rommel yn syn holle ris wat better oprêde, lykas Johan en Johan dat dogge. Dan wurdt net allinne de wrâld wer in bytsje better, mar ek menear van der Laan én fansels de strjitte mei ús troep!

HympHamp theater is in teäterkollektyf út Súdeast-Fryslân, dat lytsskalige en meast Frysktalige – of op syn minst twatalige – teäterfoarstellingen makket. Harren teaterproduksjes binne foar jong en âld altyd like fermaaklik en boppedat edukatyf.

Tongersdei 7 maaie 2026 is yn de Skierstins fan Feanwâlden in bysûndere foto-eksposysje iepene, nammentlik in tentoanstelling fan foto’s fan stinzeplanten, makke troch learlingen fan it basisûnderwiis. Learlingen fan groep 7 en 8 fan tsien basisskoallen út de regio, hawwe dizze maitiid meidien oan in nij edukatyf projekt fan De Klyster oer stinzen en stinzeplanten.

Underdiel wie it op ‘e foto sette fan stinzeplanten. Ut de hûnderten foto’s keas in saakkundige sjuery de 10 moaiste foto’s út dy’t no tentoansteld wurde yn de eksposysjeromte fan de Skierstins. Teamlieder Marjolein Staal en projektkoördinator Mirja Brandorff fan De Klyster ferwolkomden de útnûge lju en holden in taspraak by dit feestlike barren.

Op ‘e foto fan klyster Sjanne Pol sjonge wy learlingen fan groep de Ooievaars fan SBO De Twine en juf Danielle, meiwurkers De Klyster, túnfrijwilligers fan de Schierstins, Harstastate, Philippusfenne, leden Bestjoer Freonen en leden Advyskommisje Streekwurk.

It klysterprojekt mei de namme Stinzeskatten is in inisjatyf fan de Freonen fan De Klyster en is sponsore troch IMF Streekwurk Provinsje Fryslân, Versnellingsagenda Noardeast-Fryslân en stichting DikGroen. De kommende jierren wurdt dit projekt fuortset en is de leskiste ûnderdiel fan it oanbod fan De Klyster.

Lês mear yn dit parseartikel  Schierstins opent expositie vol kleurrijke stinzenfoto’s van kinderen – RTV NOF Nieuws

It jierferslach 2025 fan De Klyster is goedkard troch de Kolleezjes fan B & W fan Dantumadiel en Noardeast-Fryslân en is ta kundskip trochstjoerd nei alle riedsleden.

Lês wat wy mei-inoar yn 2025 berikt hawwe op it mêd fan natuer – en duorsumensedukaasje. In jier fol groei, gearwurking en impact (11.349 learlingen). It jierferslach fynst troch op de link te klikken  https://www.klyster.nl/over-ons/ en hielendal nei ûnderen te scrollen.

Moandei 20 april 2026 hat klystergids Peer Zaal mei learlingen fan groep 7 en 8 fan CBS De Gearing út Ie, in Bêd en Brochje foar bijen timmere en ynrjochte yn de boarterstún fan Ie. De learlingen hawwe hurd wurke en fûnen it super leuk om de hannen út de mouwen te stekken en sa in bydrage te leverjen oan it bioferskaat. Se makken ek siedbommen, sadat de ynsekten ek te iten hawwe.

Op ‘e foto ien fan de learlingen yn overal drok dwaande mei it foljen fan it bijehotel. Yn ûndersteand parseberjocht is mear te lêzen.

De Klyster bouwt met leerlingen een Bêd en Brochje foar bijen in Ie – RTV NOF Nieuws