10 – jierrich jubileum Klystergidsen Bianca van Tielen en Jan Rietberg
Bianca van Tielen en Jan Rietberg binne yn it sintsje set, fanwege harren 10 – jierrich jubileum as frijwilliger by De Klyster. Hja krigen by it ôfslutende personielsútsje wurden fan tank en it sulveren klysterspjeldsje opspjelde.
Lês it ferhaal fan Bianca en Jan yn ûndersteand parseberjocht.
Beste nijsbrieflêzer,
Yn dizze nijsbrief omtinken foar:
In protte lêswille!
Klik hier om de nieuwsbrief te lezen
OFTRAAP GREIDEFUGELPROJEKT BASISONDERWIIS YN DOKKUM
Dokkum, 25 juny 2025 – Woansdei is in nij provinsjaal edukaasjeprojekt oer greidefûgels fan start gien. It projekt mei de namme ‘Greidefûgel-fan-‘e-Wike’ is ôftrape op twa basisskoallen yn Dokkum. Learlingen fan groep 7/8 fan CBS De Hoeksteen en fan groep 5 o/m 8 fan Gereformeerde Streekschool De Schakel hiene de eare om as earsten mei it projekt oan ‘e slach te gean.
De fokus fan it greidefûgelprojekt leit op de fjouwer karakteristike Nederlânske greidefûgels: de ljip, skries, strânljip en tsjirk. De oanlieding fan it edukaasjeprojekt is de alarmearjende delgong fan de greidefûgelstân yn Nederlân. Mei dit projekt wol inisjatyfnimmer natuer – en miljeuedukaasje sintrum De Klyster, mei partners provinsje Fryslân, IVN en DikGroen, bern op in boartlike en learsume wize belûke by de beskerming fan ús natuer. “Als je natuur wilt beschermen, moet je er eerst een band mee opbouwen,” sizze de inisjatyfnimmers.
It Kabouterpaad is fernijd! Alana (yn’e midden) hat de âlde opdrachten yn in nij jaske stutsen en in tal nije opdrachten betocht. Us Klystergidsen Betty en Tineke (links & rjochts) stiene dit semester wer klear om de groepen 1 o/m 4 te ferwolkomjen.
Mei in kaboutermûtse op gean de learlingen op’en paad. By elke kabouter dy’t se tsjinkomme dogge de learlingen in aardige (nije) natueroerdracht. Alle sintugen wurde ynskeakele en se bewege hearlik yn’e bûtenloft.
Freed 20 juny 2025 naam Gerben Wiersma ôfskied as wethâlder fan de gemeente Dantumadiel.
Gerben Wiersma hat ‘m yn syn karriêre fan goed 11 jier altyd fol ynset foar De Klyster. Wiersma fûn it hiel wichtich dat jongeren belutsen waarden by de natuer yn harren eigen leefomjouwing. Hy kaam dan ek geregeld op besite by in natuerekskurzje en liet altyd oprjochte ynteresse sjen. Ek plante er mei de Boomfeestdagen mannich beamke mei basisskoallebern.
Twa kear yn it jier fûn by De Klyster in wethâlderoerlis plak oer it gemeentlike belied op it mêd fan natuer – en miljeuedukaasje. Dizze gearkomsten wiene altyd posityf en konstruktyf.
Marjolein Staal fan De Klyster en wethâlder Hanneke Jouta namen freed ôfskied fan Gerben en betanken him tige foar de noflike gearwurking en alle ynspanning foar De Klyster.
Op ‘e foto fan links nei rjochts: Hanneke Jouta, Gerben Wiersma, Marjolein Staal. Foto Koos Scherjon
Zeist, 19 juny 2025 – Ferline wike tongersdei is klyster Marjolein Staal foar fjouwer jier beneamd as lid fan de Ledenraad van Vogelbescherming Nederland. Marjolein fynt it in hiele eare dat se keazen is. De Fûgelbeskerming bestiet al mear as 125 jier en docht fantastysk wurk foar fûgels, ek ynternasjonaal fia Bird Life.
“Fûgels meitsje my bliid en ik genietsje fan fûgels yn myn achtertún en as ik op paad bin. Dit gun ik elkenien. Graach draach ik myn stientsje by en set ik myn ekspertize en jierrenlange ûnderfining op it mêd fan (natuer)edukaasje yn. En fierder fyn ik it wichtich dat ek it Noarden fertsjintwurdige wurdt yn de Ledenraad. Fûgels ha ús in soad te fertellen. As we net goed harkje, misse we net allinnich de sinjalen oer hoe’t sy derfoar steane, mar ek dy fan ús eigen leefomjouwing.”
Op 11 juny is by de Bonifatiuskapel yn Dokkum in nij projekt start: Sûn en Lekker ite. Dit projekt wol bern alle dagen in sûne lunch jaan. It doel is om mei-inoar te wurkjen oan sûn en lekker iten. Net allinnich op skoalle, mar ek thús en yn ‘e buert.
Woansdeitemiddei wie de start fan it projekt. Elkenien mei ynteresse yn opfieding, ûnderwiis of sûnens wie wolkom by de feestlike iepening. Ut namme fan De Klyster wie Marjolein Staal oanwêzich. De Klyster hat in Grien – Sûn – Duorsum Noardeast Fryslân as útgongspunt.
Lês hier foar berjocht yn ‘e parse.
NME De Klyster naam op 11 juny diel oan de netwurkgearkomste fan Stichting Nationale Boomfeestdag op it prachtige Kastiel Groeneveld yn Baarn. Op dizze middei waarden we meinaam yn boeiende lêzingen, bygelyks oer de rol fan natuer foar de sûnens fan bern troch Jolanda Maas (VU). Barbara Rijpkema (Steatsboskbehear) gie yn op natueredukaasje yn it basisûnderwiis. Gera op den Kelder (Probos) gie yn op it belang fan klimaatbestindige beamsoarten.
De sfearfolle lokaasje bea dêrneist romte foar moeting en in moaie rûnlieding troch it kastielpark. Yn’e rin fan de dei waarden folop kennis en ûnderfining útwiksele. In weardefolle gearkomste dêr’t klysterprojektmeiwurker Yvonne de Beer mei nocht op weromsjocht!
Ofrûne healjier folgen Klystergidsen Trudy en Jurjen de training itensieden mei de klasse fan IVN natueredukaasje.
Yn de training learden de Klysters hoe’t se mei learlingen sûn itensiede kinne mei streekprodukten en yngrediïnten út de natuer. Der waard û.o. sop makke en krûdtsiis.
Ek waard der omtinken jûn oan hoe’t je itensiede mei de klasse organisearje. Om wat men leard hat gelyk yn praktyk te bringen, moasten de kursisten in gastles ûntwerpe en jaan op in basisskoalle.
De training is ûnderdiel fan it programma Jong Leren Eten Friesland.
Mei grutskens lit De Klyster witte dat Betty Kooistra de Johan de Jongbeam 2025 wûn hat.
Betty hat de natuerpriis fan Omrop Fryslân krigen, omdat se al jierren aktyf is op it mêd fan natueredukaasje, sawol foar bern as foar folwoeksenen.
Se begeliedt ekskurzjes, jout lêzingen en docht dat fol fjoer en passy. En dat wylst se autodidakt is, se hat gjin natuerachtergrûn kwa oplieding. Yn it fjild hat se har kennis opdien en dat is ek wat Betty by oare minsken oerbringe wol: it fjild yn om te sjen hoe moai de natuer is.
Fansels hat Betty letter opliedingen folge. Sy is offisjeel natuer -, waad – en wettergids. Ek koördinearret sy de natuergidsoplieding. Fierder is se geregeld te gast yn it programma Op & Ut fan Omrop Fryslân om har leafde foar de natuer te dielen.
Betty is al mear as 20 jier natuergids by De Klyster. Moai detail is dat Johan de Jong yn 1996 De Klyster iepene hat. Hy bleau oant syn dea lid fan it Komitee fan Oanrekommandaasje fan De Klyster. De Jong levere altyd braakballen oan De Klyster en Betty jout hjirmei braakbalplúslessen op de basisskoallen yn de klysterregio.
Op ‘e foto ûntfangt Betty (midden) de priis fan Haukje Rypstra, direkteur Omrop Fryslân. Foto: Aukje de Hoop