Bist in natuerminske? En fynst it leuk om bern entûsjast te meitsjen foar de natuer? Fielst dy belutsen by de natuer en it lânskip yn Noardeast Fryslân? Fynst it moai om bern in ûnferjitlike dei te besoargjen?

De Klyster is op syk nei in natuergids dy’t:

– op’en paad wol mei basisskoallelearlingen yn Noardeast Fryslân;

– it aardich fynt om mei bern om te gean en affiniteit hat mei natuer;

– somtiden ek in eigen ekskurzje betinke en útfiere wol;

– mei de bern de natuer belibje wol troch net allinne te fertellen, mar ek troch ûndersykjes te dwaan en beleefopdrachten en spultsjes te betinken.

Foar dy funksje is it Natuurgidsendiploma of in ûnderwiisfoech winsklik. De Klyster biedt de mooglikheid de natuergidsoplieding te folgjen. Dizze oplieding liedt op ta offisjeel erkend natuergids.

 

Wurktiden:

Oerdeis ûnder skoaltiid. De ekskurzjes fine plak yn de maitiid en de hjerst.

De Klyster wurket mei in frijwilligersfergoeding.

Ynteresse? Mail ús dan op info@klyster.nl of belje nei 06 – 440 850 63

Woansdei 5 febrewaris 2025 hat Marjolein Staal tegearre mei wethâlder Maaike Prins op besite west by it Wad Werelderfgoed Centrum (WEC) yn Lauwerseach. Sy waarden rûnlaat troch projektdirekteur Ardriaan Donszelmann.

It seehûnesintrum Pieterburen sil ferhúzje nei it WEC. Yn it moderne sintrum sille tenei sike seehûnen opfongen wurde. De seehûn is in yndikator foar hoe’t it steld is mei de natuerwearden yn de Waadsee. In ynteraktive tentoanstelling oer it Waad en de ynfloed fan minsklik hanneljen sil de besiker mear ynsjoch jaan.

Mar it WEC folle mear funksjes: studinten kinne der ûndersyk dwaan, toeristen kinne ite yn it restaurant mei eigensinnige kaart en der binne konferinsjesealen en je kinne der sels trouwe.

It gebou is duorsum boud en foar in grut part opboud út recycle materialen. Sa is foar de houten bûtenkant hout brûkt fan âlde dukdalven út Kiel.

April oansteande iepenet dit yndrukwekkende gebou de doarren foar besikers. Yn de takomst sil De Klyster mei it WEC petearen fiere oer gearwurking op it mêd fan it skoaloanbod.

It jierplan 2025 stiet on-line. Benijd nei wat De Klyster yn 2025 docht, ambiearret, wat it kostet en nei it team? Gean nei it menu, klik op OER DE KLYSTER en dan op De ORGANISAASJE, ûnder de kop FERANTWURDING EN BELIED stiet it jierplan.

De parse jout ek omtinken oan it jierplan:

 

Jaarplan De Klyster: Nieuwe activiteiten en projecten voor basisscholen in de regio – RTV NOF Nieuws

 

 

 

 

Damwâld, 19 desimber 2024

NME De Klyster sjocht grutsk werom op it ôfrûne jier. Yn totaal hawwe der yn 2024, 10.427 bern mei nei bûten west.

Ek is der it ôfrûne jier in soad gebrûk makke fan it útliensintrum. Skoallen hawwe yn 2024, 116 kear edukatyf materiaal liend yn ‘e foarm fan in leskist of los NME-materiaal. NME De Klyster hat der in ferskuorrend soad sin oan om yn 2025 noch mear bern ferwûnderje te litten oer de natuer.

Zie ook: Meer dan 10.000 kinderen ontdekken natuur met NME De Klyster – RTV NOF Nieuws

Boppeboulearlingen fan SBO De Twine en CBS Eben Haëzer út Dokkum hawwe dizze moanne holpen mei it fergrutsjen fan it bioferskaat op begraafplak It Damwâldsterreedsje yn Dokkum.

De learlingen hawwe mar leafst 800 biologyske blombollen plante yn in nij oanlein perk op dit gemeentlik begraafplak. Blêdlok, de boskanemoan, it krookje, it ayttablomke, it liderke, wylde hyasint, gêrsstjer en stjer hyasint sille yn’e iere maitiid bloeie en in fiedselboarne wêze foar ynsekten.

Ek binne der 24 nêstkasten ophongen foar de blaumies, blokmies, fjildmosk, bûnte miggefanger, skiere miggefanger, beamkrûper en grutte bûnte spjocht. Dêrneist binne der ek 2 flearmûzekasten ophongen. Dat draacht by oan it bioferskaat, en just dat soarget der foar dat it begraafplak in goed plak is foar minsken om harren dierberen yn it sin te bringen.

Jan van der Meer fersoarge op skoalle en op it plak sels, in gastles oer de kringloop fan it libben. De gastles foarmet ek in wichtich ûnderdiel fan it edukaasjeprojekt “Biodiversiteit op Begraafplaatsen” fan De Klyster. Projektkoördinator Jan Tiede Bouma fan De Klyster begeliede de biodiversiteitsaksje tegearre mei Theo van der Horn en kollega’s fan de gemeente Noardeast Fryslân. It projekt krige fan de skoallen in dikke 10 en de kommende jierren sille alle gemeentlike begraafplakken mei help fan learlingen mear-biodivers makke wurde.

Zie ook: Basisschoolleerlingen zorgen voor biodiversiteit op begraafplaats it Damwâldsterreedsje – RTV NOF Nieuws